Эпĕ туса пĕтереймен ĕçсене эсир туса пĕтерĕр (И.Я. Яковлев)
Чĕмпĕр Ен чăвашĕсен хаçачĕ
1989 çулхи раштавăн 30-мĕшĕнче тухма тытăннă
 
Регионта Хĕрлĕ кĕнеке кăлармалли пирки 2002 çулта Саккунсем кăларакан Пуху ятарлă саккун кăларнă. 2003 çулта администраци пуçлăхĕн хушăвĕпе кĕнекене кĕмелли ӳсен-тăран, чĕр чунсен списокне хатĕрлеме хушу кăларнă.
2004 çулта Ульяновск облаçĕн Хĕрлĕ кĕнеки кун çути курнă, 100 экземпляр тиражпа пичетленнĕ.
Хĕрлĕ кĕнекене саккунăн 16-мĕш статйипе килĕшӳллĕн кашни вунă çултан çĕнĕрен кăлармалла.
Хĕрлĕ кĕнеке – облаçри пĕтсе пыракан е çавсен ретне тăма хатĕр кăмпасен, ӳсен-тăранăн, тискер чĕр чунсемпе кайăксем пирки пĕтĕмĕшле сведенисем паракан официаллă документ.
Кĕнекене кĕрекен ӳсен-тăранпа чĕр чунсен списокне 500 тĕс кĕнĕ. Вĕсенчен 21-шĕ – çут çанталăкра пĕтнисен шутĕнче, 77-шĕ – пĕтсе ларасран ятарлă сыхлава тивĕç ӳсен-тăранпа чĕр чун.
Кĕнекере вĕсен тĕслĕ сăн ӳкерчĕкĕсене е ӳкерчĕкĕсене кĕртнĕ.
***
Çуркунне облаçри вăрмансемпе вĕсен çумĕнчи лаптăксенче илемлĕ сарă чечексем куçа илĕртеççĕ. Ăншăрт курăкĕ (адонис весенний) теççĕ ăна.
Ăншăрт курăкне халăхра унăн сиплĕх пахалăхĕшĕн хисеплеççĕ. Нумай çул ӳсекен курăклă ӳсен-тăрана облаçри Хĕрлĕ кĕнекене кĕртнĕ.
XVI ĕмĕртех адонис курăкĕпе чĕре, пӳре, шăк тытăмĕн чирĕсенчен, сывлăш тухманнипе аптăрасан, сыпăсен шыççисенчен, шăнăр туртсан, ыйхă çĕтсен сипленнĕ.
Ăншăрт курăкне çу-утă уйăхĕсенче пуçтараççĕ (вăрри тăкăнма пуçличчен) – çулçисем тулса çитнĕ, чечекĕ тăкăнман, вăррисем пулайман вăхăтра. Курăк тунине тымарĕ çумĕнчи хĕрлĕ вырăнтан касмалла.
Ăншăрт курăкĕ Раççейри 35 регионта тата Украина çĕршывĕнче – Хĕрлĕ кĕнекере.
 
: 5649, Хаçат: 16 (1212), Категори: Таван тавралах

Çĕнĕ шухăш хуш:

► Сирĕн ят:
► Шухăш: